مرحباً بالعالم!
ممكن نتكلم لاحقاً في تفاصيل الشركة اللي قاعدين نحاول نبنيها وأهدافها وأثرها والطموحات اللي عندنا لها، لكن نبغى هالمدونة توثّق عملية البناء والرحلة نفسها ونقول في أول تدوينة ليش أصلاً نفكر نتكلم ونشارك مع العالم خطوات وتفاصيل بناء هذي الشركة والقرارات والنجاحات والفشل.
عرفت عن مصطلح البناء في العلن (Build in Public) قبل تقريباً 6 سنوات لما بديت أمارس رياضة المشي لفترة وكنت حاب اسمع شي مُسلّي وتعرّفت بالصدفة وعشوائيّاً وقتها على بودكاست اسمه StartUp بس عشان شدّني اسم البودكاست، ما كانت واضحة لي فكرة البودكاست في أول عدة حلقات إنه شخص مسوّي بودكاست يشرح في كل حلقة إيش قاعد يصير معاه كل أسبوع أو أسبوعين في موضوع شركة قاعد يبنيها والأشخاص اللي يقابلهم والمستثمرين وغيره وكانت الفكرة مثيرة بالنسبة لي وجديدة وما كنت أعرف إن هذا اللي قاعد يسويه اسمه البناء في العلن.
بعدها لاحظت شي مشابه من شخص آخر اتابعه يوتيوبر اسمه Marques Brownlee (MKBHD) قاعد يشارك تطوّرات قناته والاستودوهات اللي قاعد يستأجرها لتكون مكاتب عمل له ولفريقه بعد تخرّجه وخروجه من غرفته الجامعية، الاستوديو اللي فيه حاليّاً رقم كذا وعدد الفريق صاروا كذا وصار فيه قناة منفصلة عن قناته الرئيسية اسمها The Studio يوثّقون فيها خلف كواليس صناعة فيدوهاتهم ورحلاتهم وخلف الكواليس وكنت ولازلت مفتون بهذا النوع من الفيديوهات أو المحتوى.
دائماً نحن البشر عندنا فضول لمعرفة اللي يصير خلف الستار ونحب نشوف فيديوهات خلف الكواليس حق الأفلام أو المسلسلات والبرامج اللي نتابعها وكذلك فيديوهات صناعة الأشياء عموماً كيف تتم سواء صناعة أو طبخة لذيذة ويمكن ما نصنع سيارة أو نسوي الطبخة بس يعجبنا متابعة طريقة البناء هذي كيف تتم.
ففكرنا واتفقنا إننا نسوي هذي المدونة ونسمّيها الرحلة، رحلة بناء الشركة من مرحلة ما قبل البداية ونشارك مع العالم إيش يصير معنا كل أسبوعين -أو ثلاثة- كواليس تأسيس وبناء هالشركة والتحديات والتخوّفات والإنجازات والأعياد اللي بنجيبها، والشفافية ما عليها كلام إن شاء الله.
جزء من الرحلة هذي توثيق لعملية البناء وجزء منها نتصاحب معكم المشوار وندردش في الطريق ونفضفض لكم ونتحلطكم عليكم وتطبطبون علينا، فعلاً ما نعرف وش بيصير معنا قدام بس بنعلمكم هنا كل شي فخذوا راحتكم الطريق طويل.